في شبح بيطارد الزوجين وبينكد عليهم عيشتهم، لما يتسلل لبيت الزوجية حبه حبه من غير ما يشعروا ان فيه حاجه غريبة بتحصل في العلاقه إللي ما بينهم، يبتدي الزوجين يبعدوا عن بعض ويملوا من بعض، من غير ما يعرفوا او يدوروا ايه السبب إللي وصلهم لكدا.
الغريبة بقى أن كل واحد بيشاور على التاني ويقوله أنت السبب في إللي وصلنا ليه، وفي الاخر كل واحد ياخد جنب ويبعد والفجوة تزيد مع مرور الأيام، وللأسف المشكله تكبر وتكبر من غير ما حد فيهم يتعب نفسه ويدور على السبب.
لو بصينا لأسباب الفتور في الحياة الزوجية للأسف هنلاقي انها بسبب تراكمات لأمور تافهة في بعض الأحيان كانت ممكن تتحل وقتها لكن عشان كل طرف بيكابر فالمشكلة تكبر والفجوة تكبر والمسافة تبعد والوقت ده نكون محتاجين وسيلة تربطنا ببعض تاني وأنت وحظك يا تلاقي وسيلة تقرب يا وسيلة تتوهك اكتر وتبعدك اكتر.
إيه السبب؟
السبب هو الروتين
الروتين إللي بيقضي على كل الحب واللهفة بين الأزواج، الروتين في كل حاجة في اللبس والاكل وأسلوب الحياة وطريقة الكلام ونظام البيت، كل حاجة نمطية بتتكرر بتسبب الملل والفتور بين الأزواج.
ياريت نراجع حياتنا ونشوف نقدر نغير إيه ونحاول نغيره حتى لو بحاجة بسيطة أكيد أكيد هتفرق في حياتنا كتير.
مستنية تجربوا تغيروا وتقولولي حصل إيه بعد التغيير.
تعليقات
إرسال تعليق
مرحبا بكم ونشكركم لمشاركاتكم